Swyddog y Wasg a Chyfathrebu, Cymru

Cymraeg | English

*byddwch yn dechrau ar ein cyflog pwynt mynediad o £16,147* (Cyfwerth ag Amser Llawn £26,912*) y flwyddyn, gan gynyddu i £17,156* (Cyfwerth ag Amser Llawn £28,594*) ar ôl 6 mis o wasanaeth a pherfformiad boddhaol ac i £18,166* (Cyfwerth ag Amser Llawn £30,276*) ar ôl 6 mis arall

Gwybodaeth amdanom ni 

Rydyn ni’n gwneud yn siŵr bod pobl sy’n byw ag MS wrth galon popeth rydyn ni’n ei wneud. Yr ymrwymiad hwn sy’n dod â ni ynghyd ledled y DU. 

Mae ein strategaeth yn seiliedig ar yr hyn y mae pobl y mae MS yn effeithio arnynt wedi dweud wrthym sy’n bwysig iddyn nhw. Mae’n rhoi ffocws clir a phendant i ni. 

Mae ein gwaith yn seiliedig ar obeithion a dyheadau ein cymuned MS. Gyda’n gilydd rydyn ni’n ymgyrchu ar bob lefel, yn ariannu ymchwil arloesol ac yn darparu cymorth a gwybodaeth sydd wedi ennill gwobrau. 

Ein pobl yw ein prif ased ac maen nhw’n rhan annatod o’n llwyddiant. Rydyn ni’n cynnig amgylchedd gwaith bywiog a blaengar lle byddwch chi’n gallu gwneud gwahaniaeth. 

Y swydd 

Mae hwn yn gyfle ardderchog i ymuno â’n tîm gweithgar, creadigol a chefnogol yn MS Cymru.

Byddwch yn cyfathrebu â chynulleidfaoedd Cymraeg a Saesneg, a rhaid i chi fod yn siarad ac ysgrifennu Cymraeg yn rhugl.

Rydyn ni’n chwilio am Swyddog y Wasg a Chyfathrebu dygn, rhagweithiol i ymuno â’n tîm a’n helpu ni i gyflawni ein nodau uchelgeisiol.

Yn hollbwysig, byddwch yn hybu ac yn darparu strategaethau/sylw yn y cyfryngau i hyrwyddo ein gwaith, gyda phwyslais penodol ar hyrwyddo ein gweithgareddau codi arian, ymgyrchu a gwasanaeth.

Hefyd, chi fydd ein pwynt cyswllt ar gyfer ymholiadau gan y cyfryngau. Byddwch hefyd yn cefnogi’r gwaith o ddatblygu a darparu ein cyfathrebiadau digidol, gan sicrhau bod gennym bresenoldeb cryf a chynrychioladol ar gyfryngau cymdeithasol.

Bydd gan yr ymgeisydd llwyddiannus brofiad perthnasol (er enghraifft mewn swyddfa’r wasg, asiantaeth cysylltiadau cyhoeddus neu newyddiaduriaeth), a bydd yn hyderus yn rheoli blaenoriaethau sy’n cystadlu â’i gilydd fel rhan o dîm prysur. Bydd gennych sgiliau ysgrifennu a chyfathrebu ardderchog yn Gymraeg a Saesneg, yn ogystal ag agwedd gadarnhaol.

Mae sgiliau siarad ac ysgrifennu yn y Gymraeg yn hanfodol. Ni fydd cais a gyflwynir yn Gymraeg yn cael ei drin yn ddim llai ffafriol na chais a gyflwynir yn Saesneg.

Sut mae gwneud cais 

 I wneud cais am y swydd hon, cyflwynwch y canlynol:  

1. CV cyfredol  
2. datganiad ategol. Dylai’r rhain ddangos sut rydych chi’n bodloni’r meini prawf hanfodol ym manyleb y person yn y disgrifiad swydd. 

 Anfonwch eich ceisiadau cyflawn atom dros e-bost at [email protected] 

Gellir cyflwyno ceisiadau drwy gyfrwng y Gymraeg neu’r Saesneg.

Os hoffech chi drafod y swydd yn gyfrinachol yn gyntaf, cysylltwch â’n tîm Adnoddau Dynol drwy anfon e-bost at: [email protected] 

Bydden ni’n ddiolchgar pe baech chi’n llwytho’r ffurflen monitro cydraddoldeb ac amrywiaeth i lawr ar ein gwefan a’i llenwi, ac yna’n ei chyflwyno gyda’ch cais.

Rydyn ni’n croesawu’n arbennig geisiadau gan bobl anabl a/neu bobl o gefndiroedd lleiafrifoedd ethnig.

Eich hawl i weithio yn y DU 

Mae’n rhaid bod gennych yr hawl i weithio yn y DU er mwyn gweithio mewn cyflogaeth am dâl gyda ni. Bydd angen i chi rannu dogfennau sy’n dangos eich bod yn gymwys i weithio yn y DU os byddwn yn cynnig cyflogaeth i chi. 

Fe welwch chi’r fisâu a’r trwyddedau sy’n rhoi hawl i chi weithio yn y DU ar wefan Llywodraeth y DU. Does gennym ni ddim cytundeb Trwydded Noddwr â’r Swyddfa Gartref ar hyn o bryd ac allwn ni ddim rhoi cymorth i chi gyda’ch ceisiadau am fisa.  

Cyflogwr Hyderus o ran Anabledd 

Rydyn ni’n Gyflogwr Hyderus o ran Anabledd ac rydyn ni wedi ymrwymo i hyrwyddo cydraddoldeb ac amrywiaeth.  

Gallwch chi ofyn am addasiadau rhesymol fel rhan o’n prosesau recriwtio a chynefino gweithwyr newydd. 

Os oes angen unrhyw gymorth neu addasiadau arnoch chi i wneud cais am y swydd hon, anfonwch e-bost at [email protected] 

Gallwch chi hefyd ofyn i ni anfon y deunyddiau ymgeisio atoch chi mewn fformat gwahanol. Er enghraifft, gallwch ofyn i ni eu hanfon atoch chi drwy e-bost neu mewn fformat Word mwy o faint.  

Mwy am ein proses recriwtio a dethol 

Mae rownd gyntaf ein proses recriwtio a dethol yn cynnwys cyfweliad gyda chwestiynau sy’n seiliedig ar gymhwysedd. 

Gall ein proses recriwtio a dethol hefyd gynnwys tasgau ychwanegol. Er enghraifft, prawf ysgrifenedig neu ar Microsoft Excel neu wneud cyflwyniad.  

Byddwn yn rhoi gwybod i chi beth fydd cynnwys y broses ddethol pan fyddwn ni’n eich gwahodd i gyfweliad. Fel rhan o'r gwahoddiad, gallwch chi ofyn am unrhyw addasiadau rhesymol eraill ar gyfer y cyfweliad. 

Efallai y cewch eich gwahodd am ail gyfweliad hefyd. Byddwn yn rhoi gwybod i chi am hyn yn ystod y broses ddethol. 

Mwy am ein buddion i weithwyr: 

Mae gennym ni ystod eang o fuddion i weithwyr gan gynnwys (ond heb fod yn gyfyngedig i): 

Annog cydbwysedd rhwng bywyd a gwaith 

• 39 diwrnod o wyliau pro rata (gan gynnwys gwyliau banc) - pro rata ar gyfer swyddi rhan-amser
• Mwy o hawl i wyliau blynyddol, yn seiliedig ar hyd eich cyflogaeth
• Opsiynau gweithio’n glyfar (gyda’r cyfle i weithio o bell a dod o hyd i batrwm gweithio’n glyfar sy’n addas i chi ac i ni) 
• Opsiynau gweithio’n hyblyg 

Gofalu amdanoch chi a'ch teulu 

• Hawl hael i dâl salwch 
• Mwy o hawl i dâl salwch, yn seiliedig ar hyd eich cyflogaeth 
• Cyfle i brynu a gwerthu gwyliau blynyddol ym mhob blwyddyn galendr 
• Mynediad am ddim i feddyg teulu ar-lein 24 awr y dydd, 7 diwrnod yr wythnos sy’n rhoi cyngor, sicrwydd a diagnosis di-ben-draw i chi, lle bo hynny’n briodol 
• Mwy o absenoldeb i rieni newydd 
• Mynediad am ddim i wasanaeth llinell gymorth gyfrinachol 24 awr y dydd, 7 diwrnod yr wythnos ar eich cyfer chi a’ch teulu gydag amrywiaeth o gefnogaeth a gwybodaeth arbenigol
• Opsiynau absenoldeb arbennig (fel hyd at 5 diwrnod o wyliau gyda thâl bob blwyddyn ar gyfer argyfyngau domestig neu bersonol) 
• 10 diwrnod o absenoldeb anabledd y flwyddyn, pro rata ar gyfer swyddi rhan-amser 
• 10 diwrnod o absenoldeb gofalwr bob blwyddyn, pro rata ar gyfer swyddi rhan-amser 
• Buddion newydd sy’n ystyriol o deuluoedd, gan gynnwys absenoldeb â thâl:
• os bydd camesgoriad neu farw-enedigaeth
• i gefnogi triniaethau ffrwythlondeb
• ar gyfer apwyntiadau cyn geni i’r ddau riant
• Cynllun beicio i’r gwaith 
• Cynllun marw yn y swydd 

 Meddwl am eich sefyllfa ariannol 

• Cynllun pensiwn aberthu cyflog uwch 
• Benthyciad tocyn tymor rhatach a benthyciadau di-log mewn argyfwng 
• Rhoi arian wrth i chi ennill cyflog i gefnogi elusennau eraill o’ch dewis cyn treth  
• Porth newydd i weithwyr, gan gynnwys talebau cynilo ar gyfer ffordd o fyw a lles personol  

 Cyfoethogi eich bywyd yn y gwaith 

• Cynlluniau datblygiad personol gydag ystod eang o gyrsiau hyfforddi a chyfleoedd i ddod o hyd i opsiynau hyfforddi ychwanegol gyda’ch rheolwr llinell 
• Cyfleoedd prentisiaeth mewnol blynyddol  
• Swyddfeydd newydd, modern sy’n croesawu cydweithio wyneb yn wyneb ac o bell 
• Amryw o gyfleoedd i ddylanwadu ar sut rydyn ni’n gweithredu’n fewnol (gan gynnwys arolygon, a grwpiau ffocws a phwyllgorau) 
• Grwpiau rhwydweithio mewnol gweithredol a chefnogol i weithwyr er mwyn cydweithio a chefnogi cyfoedion 
• 2 ddiwrnod o wyliau â thâl y flwyddyn ar gyfer gwirfoddoli mewn gweithgareddau MS Society yn ystod oriau gwaith arferol (fel digwyddiadau codi arian, neu ymgyrchu yn y gymuned leol) 
• 2 ddiwrnod o wyliau â thâl y flwyddyn ar gyfer gwirfoddoli gydag elusennau eraill yn ystod oriau gwaith arferol   

Diogelu

Rydyn ni wedi ymrwymo i ddiogelu a hyrwyddo lles pawb sy’n defnyddio ein gwasanaethau a phawb rydyn ni’n dod i gysylltiad â nhw.

Mae hyn yn wir waeth beth yw eu:

• rhywedd
• hil
• anabledd
• cyfeiriadedd rhywiol
• crefydd neu gred 
• beichiogrwydd
• ailbennu rhywedd

Rydyn ni’n cydnabod ein cyfrifoldeb penodol i sicrhau bod oedolion a phlant agored i niwed yn cael eu hamddiffyn.

Mae gennym fesurau ar waith i ddiogelu pawb rydyn ni’n dod i gysylltiad â nhw rhag cael eu cam-drin mewn unrhyw ffordd.